Tuesday, December 26, 2006

هوا دا اللي في الكوباية

النهاردة بقى كله هيعرف ايه اللي بيحصل في اتحاد الطلبة المعين طبعا اللي للاسف انا واحد من اهم قياداته و زي ما قلت قبل كدا انا ندمان ولن اسامح نفسي على هذه الجريمة المهم النهارده بقى هنعرف ابه اللي في الكوباية
المرحلة الاولى : "المستوى الأول"
كل اول سنة وعلى مدار فترة الكلية كلها وانا بتابع اللي بيحصل من قلب الحدث فيه في كل كلية اوضة مجهزة بكل حاجة ولاكأنها القيادة
الوسطى للجيش الامريكي المهم دي طبعا اوضة قائد الكلاب كل كلب في بيشارك في الجريمة دي يجي كل سنة يقدم اوراق اعتماده للسنة الجديدة ففيه اللي بيجيب واسطة وفيه اللي بيجيب الأهم من الواسطةبنت ولا اتنين تصوروا ان الاتحاد اللعبة الصغيرة دي وصلت للرشوة الجنسية ومع دا كله يبدأ تقييم المتقدمين اللي مش بيزيدوا عن 4 مرشحين للكلب الكبير والكلب المساعد بواقع اتنين لكل منصب و بيتم اختيار الكلب والمساعد بتاعه وفقا للبنات او الوسايط اللي جابها ويبدأ تكوين الاتحاد بحيث ان الانتخابات تسير في اتجاه المرشح المدعوم منه فيطلب من الكلاب السمينة بتاعته تكوين الاتحاد و كل كلب بياخد لجنة يجيب فيها اصحابه اللي هينتخبوه و ينتخبو مساعد اللجنة اللي هو يقول عليه وبالتالي لما نقدم الاسماء دي هي اللي بتتقبل و الباقي يتشطب وننجح بالتزكية زي ما بيقولوا و هي دي انتخابات المرحلة الاولى اللي بيبقى عليها المشاكل اللى لها صدى واسع
المرحلة التانية : "المستوى الثاني"
ولاننا اختارنا كل طلبة اللجان فبينج امناء وامناء مساعدين اللجان اللي احنا قلنا عليهم مع رئيس الحرس وعددهم 12 واحد بيبقى فيهم كلاب الحرس الخاص وطبعا في المرحلة دي غالبا النجاح بالتزكية
المرحلة التالتة : "المستوى الثالث"
الكلاب الخاصة مش بتنام يوم الاتحاد قبل ما تيجي أوامر القائد الاعلى للقوات ال... الاوامر طبعا هي هما هيدوا لمين امين وامين مساعد
اتحاد واللي مينفذش عليه كل الويل لدرجة وصلت للتهديد بالتسقيييط

تخيلوا ياجماعة ان هي دي الحرية و هو دا العمل السياسي في جامعاتنا لا سياسة ولا عمل و لا يحزنون بقت مصالح ورشاوي جنسية ولسه..........

Friday, December 22, 2006

الكوباية فيها ايه

البلوج دا انا سجلته من زمان بس كنت ناوي انه يبقى ضحك ولعب وحب يعني مش حامل هم حاجة لأني دايما باصص لنص الكوباية المليان "مش عارف مليان ايه بظبط " دلوقتي لازم يبقى فيه جد دي اخر سنة ليا في الكلية - قولوا يارب- مع اني مش عارف انا هاشتغل ايه بس لقيت ان اول حاجة اعملها اني اعترف باكبر اخطائي واطلب الصفح والغفران من كل مصر من كل طلاب كليتي و من 40 طالب اخدت حقهم في الخدعة الكبيرة اللي اسمها اتحاد الطلابية اللي مش بتتعين من ادارة الكلية لكنها من امن الكلية اللي هوا بجد بيدير كل الكلية وبالتليفون من غرفته احنا كلناعموما و في كليتي خصوصا وصلنا لحد خطير جدا هو ان الكليات بقت ادارة من ادارة مديرية الامن اهم حاجة عندنا -عقولنا- بقت لعبة في ايد فئة كلنا عارفينها وعارفين سمعتهاكنت فاهم ان تدخل الامن في الكلية علشان طلبة الاخوان اللي مش بحب فكرهم لكن كمان بيتدخل ضد كل واحد صاحب فكر ضد اي واحد ممكن يفكر ممكن يحاول ممكن يعمل حاجة بيتدخل حتى وسط كلابه اللي انا للاسف واحد منهم كنت مقص في ايد الرقيب كارت يلعب بيه و يرميه وقت ما يتحرق و من معارفي (كلاب الامن) في بقية الجامعة واضح انها يا جماعة سياسة دولة لتعليم شباب البلد الخوف والرضا بالذل و الهوان والاستعباد و الوصولية انها عودة بالبلد لفترة الاستعمار بس من نوع جديد المستعمر فيه طبقة فاسدة للاسف من ابنائها الفاسدين احنا في عهد الانتداب المصري على مصر
انا بكره هبدأ السنة رقم 23 من عمري و معاها با حاول افتح صفحة جديدة في حياتي اتمنى اني أكون بداتها صح و هي الاعتذار لكل اللي اسأت اليهم
اما بالنسبة للاتحاد فباذن الله البوست الجاي هيبقى فيه كل اللي كان بيحصل و التدخلات الصريحة من الامن و الاوامر العليا والدنيا من اول مدير الامن لغاية اصغر امين شرطة في الكلية
مرة تانية و مش اخيرة انا باطلب الغفران من كل اللي اسأت لهم و اعتذر لكل من ظلمتهم و اتمنى يسامحوني و يساعدوني اني ابد الصفحة دي و ربنا غفور رحيم
واعذروني يا جماعة لسوء اسلوبي و باذن الله يتحسن